அபிவிருத்தி அரசியல் நோர்வே ”அறிவோர் அரங்கத்தையும்” அம்பலப்படுத்துகிறது.



சில வாரங்களுக்கு முன் நோர்வேக்கு வடமாகாண சுகாதார அமைச்சர் வந்திருந்தார்.

அவர் வந்தது ஒன்றும் தற்செயல் அல்ல.

இலங்கை அரசுடன் இணைந்து மிக நெருக்கமாகச்செயற்படும் நோர்வே ஈழமக்கள் அவையின் தலைவர் பஞ்சகுலசிங்கம் கந்தையா, நோர்வே தமிழர் சுகாதார அமைப்பின் தலைவர் பல்வைத்தியர் சிவகணேசன், Balasingham Yogarajah ஆகியோரின் பேச்சுவார்த்தையின் தொடர்ச்சியாகவே சுகாதார அமைச்சர் இங்கு வந்தார்.

இதற்கு நோர்வே அரசின் உதவியும் உண்டு. நோர்வே அரசும் அபிவிருத்தி அரசியலின் முக்கிய பங்காளி.

சுகாார அமைச்சருடன் நோர்வே அரசு, நோர்வே அரச நிறுவனங்கள் என்று பேச்சுவார்த்தைகள், சுற்றுலாக்கள் நடந்தன.

மிக முக்கியமாக சந்துரு விசாகப்பெருமாள், Balasingham Yogarajah அகியோரின் தலைமையில் இயங்கும் ”அறிவோர் அரங்கத்திற்கும்” பெரும் விளம்பரத்துடன் சுகாதார அமைச்சர் அழைக்கப்பட்டு சந்திப்பு நடைபெற்றது.

இந்த நிகழ்வானது சுகாதார அமைச்சர் மீதான குற்றச்சாட்டுகள் இருக்கும்போதே அவருடன் நெருங்கிய உறவினைப்பேணும் நோர்வே பிழைப்பு அரசியல்வாதிகளுடன் அறிவோர் அரங்கமும் கைகோர்த்துள்ளதா என்னும் கேள்வியும் எழுகிறது.

இந்த சுகாதார அமைச்சரே தற்போது வடமாகாண முதல்வருக்கெதிரான நம்பிக்கையில்லாப்பிரேரணையின் முக்கியஸ்தருள் ஒருவர்.

வடமாகாண முதல்வரை ஓரம்கட்டும் இந்த நடவடிக்கை மிகத் தந்திரமாகத் திட்டமிடப்பட்டு, இரகசிய ஆதரவுகளைப்பெறுவதற்காக புலத்துத் தமிழர்களிடம் அனுப்பப்பட்டவரே வடமாகாண சுகாதார அமைச்சர். தமிழர் கட்சிகள் அல்லாத வடமாகாண கட்சிகளிடமும் இலங்கை அரசின் ஊடாக ஆதரவு பெறப்பட்டு நடாத்தப்பட்ட அரசியல் நகர்வு.

இவற்றை எல்லாம் அறியாதவர்கள் அல்லர் நோர்வே சுகாதார அமைச்சரை அழைத்தவர்கள்.

நோர்வே தமிழ் மக்களிடம் ஊழற்குற்றச்சுாட்டப்பட்ட சுகாதார அமைச்சரை பிரபலப்படுத்தும் திட்டம் ரீரீசி, நேர்வே ஈழமக்கள்அவை, Balasingham Yogarajah, சந்துரு விசாகப்பெருமாள் ஆகியோரின் ஆசீர்வாதத்துடனேயே நடைபெற்றுள்ளது என்பது தெளிவாகவே புரிகிறது.

நோர்வேயில் உள்ள பெரும்பான்மையான தமிழர் அமைப்புக்களிடையே இலங்கை அரசு மிகத் தந்திரமாக ஊடுருவியுள்ளது என்பதனையே ”அறிவோர் அரங்கத்தின்” சுகாதார அமைச்சரைப் பிரபலப்படுத்தும் நடவடிக்கையும் எடுத்துக்காட்டுகிறது.

காற்றுப் புகாத இடத்திலும் அபிவிருத்திஅரசியல் புகும்




நோர்வே ஈழமக்கள்அவை இலங்கை அரசுடன் இணைந்து செயற்படுகிறது என்று தமிழ்நெட் உறுதிப்படுத்துகிறது.

தமிழ்நெட் ஜெயச்சந்திரன்  தனது சக தோழர்கள் ஸ்ரீலங்கா அரசுடன் தேனிவுகொண்டாடுவதுபற்றி
ஏன் எழுதவில்லை என்று கேட்டு சனிக்கிழமைதான் எழுதியிருந்தேன்..

ஞாயிற்றுக்கிழமை மாலையே  ஒரு செய்தி வெளியிட்டிருக்கிறார்.

அதில், ஈழமக்கள்அவையும், நோர்வே தமிழர்களில்   சுதாரத்துறையைச் சேர்ந்த முக்கியமானவர்கள் சிலரும் ஸ்ரீலங்காவுடன் இணைந்து செயற்படுகிறார்கள் என்று எழுதியிருக்கிறார்.

// Interestingly, all the three networks are involved in deceiving sections of Tamil diaspora, particularly those who were directly and indirectly involved in the TGTE, GTF and Norwegian Council of Eezham Tamils (NCET). The collaborators in the expanded Diaspora-programme, particularly those from Norway, hail from the health sector. //

[TamilNet, Sunday, 04 June 2017, 23:12 GMT]

இதனை எழுதுவதற்கு இத்தனை காலம் பொறுமைகாத்ததன் இரகசியம் என்னவென்பதை அவர் மட்டுமே அறிவார்?

ஸ்ரீலங்கா அரசின் பக்கம் சாய்ந்துவிட்ட தனது உற்ற நண்பர்களின் பெயரை, ரீரீசியையும் விசுவாசிக்கும் உண்மையான விசுவாசிகளுக்காகவாவது எழுதும் அகச்சுத்தியும், நேர்மைத்தன்மையையும் கூட அவரிடம் இப்போதும் காணமுடியவில்லை. (நண்பர்களையும் தன்னையும் பாதுகாத்துக்கொள்ளும் எண்ணமாகவும் இருக்கலாம்)

தமிழ்நெட், தனது கடடுரையில்  நோர்வே ஈழமக்கள்அவையின் தலைவர் பஞ்சகுலசிங்கம் கந்தையா என்பதை தெளிவாகவே ஒப்புக்கொள்கி்ன்றது.

தவிர, நோர்வே ஈழமக்கள்அவையையும் பகிரங்கமாகவே துரோகிகளின் பட்டியலில் சேர்த்துவிட்டிருக்கிறது.

எனது கேள்வி என்னவெனில்...

தமிழ்நெட் ஜெயச்சந்திரனின நெருங்கிய சகாவும், சர்வதேச ஈழமக்கள்அவையின் பேச்சாளரும் நோர்வே ஈழமக்கள்அவையின் முக்கிய உறுப்பினருமான ஸ்டீபன் புஸ்பராஜா இந்தக் குற்றச்சாட்டிற்கு என்ன சொல்லப்போகிறார் என்பதும்...

நோர்வே ஈழமக்கள்அவையினர்  தங்களை தமிழ்நெட் துரோகிகளாக்கியதற்கு என்ன சொல்லப்பொகிறார்கள் என்பதும்தான்.

நோர்வே புலிகள் பகிரங்கமாகவே தங்களுக்குள் மோதிக்கொள்ள ஆரம்பித்துவிட்டார்கள் என்பது தெளிவாகவே தெரிகிறது.

விசுவாசிகளின் பாடு திண்டாட்டம்தான். பாவம் அவர்கள்.
நம்பி ஏமாந்தவர்கள் அவர்கள்தான்.,

எந்தப் பக்கத்தின்  பொய்யை நம்புவது என்பது அவர்களுடைய  பிரச்சனை.

இன்னும் என்ன பொய்யைச் சொல்லி விசுவாசிகளை ஏமாற்றலாம் என்பது மற்றையவர்களுடைய பிரச்சனை.

சாதாரண மனிதர்களைக்கூட துரோகிகள், எட்டப்பன்கள் என்று நாக்கூசாது பேசி,  எள்ளி நகையாடி, தமது ஊடகங்களின் ஊடாக பொய்யான பிரச்சாரம்செய்து,  சமூகத்தில் இருந்து ஒதுக்கிய இவர்களை, அவர்களின் உற்ற சகாக்களைக்கொண்டே ”துரோகிகள், ஒத்தோடிகள்” என்று தூற்றவைத்திருக்கிறது காலம்.

காலம் பொல்லாதது நண்பர்களே. பொய்யையும் புரட்டையும் அது வாழ விட்டதாய் சரித்திரமில்லை.

ஸ்ரீலங்காவின் அபிவிருத்தி அரசியலுக்குள் சிக்கிவிட்ட தேசியம் பேசும் அமைப்புக்கள்


சற்று நீளமான கட்டுரை. நேரமும் ஆர்வமும் உள்ளவர்களுக்கு மட்டும்.
******


நோர்வேஈழமக்கள் அவையின் தலைவர் பஞ்சகுலசிங்கம் கந்தையா மற்றும் மக்களவை உருவாக்க காலத்தில் முக்கியப்படுத்தப்பட்டவரும், ரீரீசியின் உபஅமைப்பான நோர்வே தமிழர் சுகாதாரஅமைப்பின் தலைவர், பல்வைத்தியர் சிவகணேசன் அவர்களும் ஸ்ரீலங்கா அரசின் சிறப்பு அழைப்பினை ஏற்று இரகசிய பேச்சுவார்த்தைகளில் ஈடுபட்டுக்கொண்டிருந்தபோது எடுக்கப்பட்ட புகைப்படம் இணையத்தளங்களில் வெளியாகி சில வாரங்களே ஆகும்போது பஞ்சகுலசிங்கம் கந்தையா அவர்களைத் தலைவராகக்கொண்ட நோர்வே ஈழத்தமிழர்அவை திடீரென நோர்வே ஈழமக்கள் அவைக்கான தேர்தலை நடாத்தப்போவதாக அறிவித்துள்ளது.

கடந்த 5 ஆண்டுகளாக நடைபெறாது, மறக்கப்பட்டிருந்த இருந்த இந்தத் தேர்தலுக்கான அவசியம் இப்போது உருவாகவேண்டியதன் காரணம் என்ன? இதனை மக்களுக்கு பகிரங்கமாக அறிவிப்பதல்லவா அறம்? அதைத்தவிர்த்து தனியே அவசர அவசரமாக தேர்தலை நடாத்துவது ஏன்?

இது தவிர, வேறு நாடுகளிலும் ஈழமக்கள் அவைகளுக்கான தேர்தல் நடைபெறுகின்றன என்ற தகவல் எதையும் இணையத்தளங்களில் காணமுடியவில்லை.

ஈழமக்கள் அவையினர் 2009ம் ஆண்டு தேர்தலை நடாத்தியதுபோன்றும், யாப்பில் கூறப்பட்டுள்ளது போன்றும் நான்கு ஆண்டுகளுக்கு ஒரு முறை, சுயாதீனமான தேர்தல்குழு பகிரங்கமாக அறிவிக்கப்பட்டு;, வேட்பாளர்கள் அறிவிக்கப்பட்டு, தேர்தல் மையங்கள் அமைக்கப்பட்டு ஜனநாயகமான முறையில் இம்முறை இவர்கள் தேர்தலை நடாத்தவில்லை என்பதும் முக்கியமாகக் கவனிக்கத்தக்கது.

இவ்வாறு அவசர அவசரமாக இத்தேர்தலை நடாத்துவதன் நோக்கமென்ன?
இத்தேர்தலின் முக்கிய நோக்கம் மீண்டும் நோர்வே தமிழ் மக்களின் ஏக பிரதிநிதிகளாக தங்களை தாங்களே அறிவித்துக்கொள்வதும் அதனை அடிப்படையாகக்கொண்டு நோர்வே அரசுடனான தொடர்புகளின் மூலம் ஸ்ரீலங்கா அரசுடன் “அபிவிருத்தி” என்னும் பெயரில் ஈழத்தமிழ்த் தேசியத்தை விலைபேசும் நடவடிக்கைகளில் ஈடுபடுவதே இன்றி வேறு எதுவுமில்லை.



அபிவிருத்தியின் பெயரிலான ஸ்ரீலங்கா அரசின் ராஜதந்திரம்

2009க்குப் பின்னர் வடகிழக்கில் போரினால் பாதிக்கப்பட்ட மக்களுக்கான அபிவிருத்தியில் ஸ்ரீலங்கா அரசு உண்மையான அக்கறையைக் காட்டியிருக்கிறதா?

காணாமல்போனோருக்காக பொறுப்புக்கூறலுக்கு என்னவாயிற்று?
முள்ளிவாய்க்கால் பேரழிவின் பொறுப்புக்கூறல் ஸ்ரீலங்காவாலும் ஸ்ரீலங்காவுக்கு சார்பான மேற்குலகத்தாலும் எவ்வாறு தட்டிக்கழிக்கப்பட்டு, காலம்தாழ்த்தப்படுகிறது என்பதை நாம் அறிவோம்.
தமிழர் தாயக நிலங்கள் விடுவிக்கப்படவில்லை, புதிய நிலங்கள் அரசுடமையாக்கப்படுகின்றன.

இப்படியாக ஸ்ரீலங்கா அரசு, ஈழத்தமிழர்களுக்கு எதிராக மிகவும் திட்டமிட்ட அடக்குமுறைகளை மேற்கொள்ளும்போது “அபிவிருத்தி” என்னும் பதாதையின் கீழ் எவ்வாறு மக்களவை ஸ்ரீலங்கா அரசுடன் பேச்சுவார்த்தைகளை நடாத்துவதற்கு தனது தலைவரை அனுப்பலாம் என்ற கேள்வி எழுகிறதல்லவா?

விடுதலைப்புலிகளின் அமைப்புக்களில் கொள்கைமாற்றங்கள் ஏற்பட்டிருக்கின்றனவா?

விடுதலைப்புலிகளின் அமைப்பான ரீரீசி சார்ந்த மக்களமைப்புக்கள் தங்களது தேசியம்பற்றிய நிலைப்பாடுகள், கொள்கைகள், செயற்பாடுகள் மாற்றமடைந்துள்ளன. நாம் ஸ்ரீலங்கா அரசுடன் இணைந்துசெயற்படுகிறோம் என்பதை பொதுமக்களுக்கு மறைத்து, ஸ்ரீலங்கா அரசுடன் மிக இணக்கமான நிலைப்பாடுகளைப் பேணுகிறார்கள் என்பதே உண்மை.

ஸ்ரீலங்கா அரசு, தமிழர்களிடம் எஞ்சி இருக்கும் ஒரு சில நிறுவனங்களினுள்ளும் மிகவும் தந்திரமாக ஊடுருவி இருப்பதையும், ஸ்ரீலங்காவின் ராஜதந்திர வலையில் ஈழமக்கள் அவையும், ரீரீசியும், நோர்வே தமிழர் சுகாதார அமைப்பு போன்ற நிறுவனங்களும் விழுந்திருப்பதும் இதனை மிகத் தெளிவாக எடுத்துக்காட்டுகின்றன.

இந்நிறுவனங்களுக்கு எப்போதும் விசுவாசமாக இயங்கிய, இயங்கும், தேசியத்தின்பால் உண்மையான பற்றுக்கொண்ட மனிதர்களால் இவற்றை ஏற்றுக்கொள்ளமுடியாதிருக்கும் என்பது உண்மைதான். ஆனாலும் விசுவாசமான தொண்டர்களின் கருத்துக்களை, விமர்சனங்களை மேலிடம் ஏற்றுக்கொண்டு பதிலளிப்பதாகவும் தெரியவில்லை.



நோர்வே ஈழமக்கள்அவையின் தலைவர் யார்?

ஈழமக்கள்அவையின் செயற்குழு உறுப்பினர் ஒருவர் பின்வருமாறு கூறினார்.

“பஞ்சகுலசிங்கம் கந்தையா அவர்கள் துரோகத்தனமான நடவடிக்கைகளில் ஈடுபடுவதால் நாம் அவரை எமது அமைப்பில் இருந்து வெளியேற்றிவிட்டோம், இது தவிர ரீரீசி யின் தற்போதைய தலைவரிடமும் ஏன் பஞ்சகுலசிங்கம் கந்தையா பற்றி வெளிப்படையாகப்பேசுவதைத் தவிர்க்கிறீர்கள்” என்று தான் கேட்டதாகவும்  அப்போதும் எதுவித பதிலும் கிடைக்கவில்லை என்றும், அத்துடன் சர்வதேச ஈழமக்கள் அவையின் பேச்சாளரும், நோர்வே பிரதிநிதியுமான ஸ்டீபன் புஸ்பராஜாவிடமும் “பஞ்சகுலசிங்கம் கந்தையா அவர்களை ஈழமக்கள் அவையில் இருந்து வெளியேற்றியுள்ளோம் என்று பொதுமக்களுக்கு அறிவிக்கும்படியும்” கூறியபோதும் அவரும் இன்றுவரை இவ்விடயத்தை பகிரங்கமாக அறிவிக்க தயங்கிவருகிறார் என்றார்.

ரீரீசி, நோர்வே ஈழமக்கள்அவை, சர்வதேச ஈழமக்கள்அவை அகியன இந்த விடயத்தை மறைக்கவும், பேசாதிருப்பதற்கும் காரணம் உண்டு. அதனை இக்கட்டுரையின் வேறுபகுதியில் பார்ப்போம்.

ஈழமக்கள்அவையின் செயற்குழுஉறுப்பினர், கூறிய “தமது தலைவரை வெளியேற்றிவிட்டோம்” என்ற கூற்று முற்றிலும் பொய்யானது. ஏன்னெனில்:

  • ஈழமக்கள்அவையின் இணையத்தளம் பஞ்சகுலசிங்கம் கந்தையா அவர்களே தங்களது தலைவர் என்று, இன்றும் அறிவிக்கின்றது.
  • அவரும் அதை மறுத்துரைத்து எவ்வித அறிக்கையையும் இத்தனை சலசலப்பின் பின்னரும் வெளியிடவில்லை என்பதையும் நாம் முக்கியமாக கவனத்தில்கொள்ளவேண்டும்.
  • இதுதவிர நோர்வே நோர்வே அரசின் நிறுவனப்பதிவகமும் பஞ்சகுலசிங்கம் கந்தையா ஈழமக்கள்அவையின் தலைவர் என்கிறது.
ஸ்ரீலங்கா அரசுடனான பேச்சுவார்த்தை முடிந்தபின்னராவது ஈழமக்கள்அவையினர் தங்களுக்கும் பஞ்சகுலசிங்கம் கந்தையாக்கும் எதுவித தொடர்புமில்லை என்று ஏன் இன்றுவரை பகிரங்கமாக தெரியப்படுத்வில்லை அறிவிக்கவில்லை என்ற கேள்வி எழுவதையும் இவ்விடத்தில் தவிர்க்கமுடியாது.

தங்களது இணையத்தளத்திலாவது அவர் எமது நிறுவனத்தின் தலைவரல்ல, அவர் சுயாதீனமானவே ஸ்ரீலங்கா அரசுடன் பேச்சுவார்த்தையில் ஈடுபட்டார் என்றாவது இவர்களினால் ஏன் இன்றுவரை மறுத்துரைக்க முடியவில்லை?

எனவே பஞ்சகுலசிங்கம் கந்தையா அவர்களே ஈழமக்கள்அவையின் தலைவர் என்பது இவற்றின்மூலம் சந்தேகமற நிரூபணமாகிறது.



அபிவிருத்தி அரசியலுக்கு பலியானவர்கள்

ஈழ மக்கள் அவைக்கும், நோர்வே ரீரீசிக்கும், நோர்வே விடுதலைப்புலிகளின் நிறுவனங்களுக்கும், தமிழ்நெற் ஜெயச்சந்திரனுக்கும் இடையில் உள்ள அதிநெருங்கிய தொடர்பினை அறிந்தவர்களுக்கு, இவற்றினை பின்புலத்தில் இருந்து இயக்குவது தமிழ்நெற்  ஜெயச்சந்திரன் என்பது ஒன்றும் இரகசியமல்ல.

தமிழ்நெற் குழுமத்துடன் நெருங்கிய தொடர்புகளையுடைய ஊடகங்கள் எத்தனை உள்ளன என்பதும், சர்வதேச விடுதலைப்புலிகளின் வலையமைப்பிற்கும் தமிழ்நெற்றுக்கும் ஜெயச்சந்திரனுக்கும் உள்ள நெருங்கிய தொடர்பும் அனைவரும் அறிந்ததே.

பஞ்சகுலசிங்கம் கந்தையா மற்றும் பல்வைத்தியர் சிவகணேசன் ஆகியோரின் மிக நெருங்கிய ஆலோசனையாளரும் வழிகாட்டியும் தமிழ்நெற் ஜெயச்சந்திரன்.

இதற்கு இன்னுமொரு உட்காரணமும் உண்டு.

ஸ்ரீலங்கா அரசுடன் பேச்சுவார்த்தை நடாத்தியவர்கள் இருவரும் நோர்வே விடுதலைப்புலிகளின் நிறுவனங்களின் மற்றும் தமிழ்நெற் ஜெயச்சந்திரன் ஆகியோரின் மிக நெருங்கிய சகாக்கள். அதுமட்டுமல்ல 2009க்குப்பின் நோர்வேயில் உருவாகிய திடீர் தமிழ் முதலீட்டாளர்களில் மிக முக்கியமானவர்கள் இவர்கள். தீபம் Tv , வேறு பல வியாபாரநிறுவனங்கள், தென்னிந்திய திரைப்படத் தயாரிப்பு என்று பல முதலீடுகளில் ஈடுபட்டவர்கள், ஈடுபடுபவர்கள்.

சர்வதேச ஈழமக்கள்அவையின் பேச்சாளரும் நோர்வே ஈழமக்கள்அவையின் முக்கிய உறுப்பினருமான ஸ்டீபன் புஸ்பராஜா அவர்களும் மேற்கூறியவர்களது மிக நெருங்கிய சகமுதலீட்டாளர்.

ஸ்டீபன் புஸ்பராஜா அவர்களும் பஞ்சகுலசிங்கம் கந்தையா அவர்கள் ஈழமக்கள் அவையின் சார்பில் ஸ்ரீலங்கா அரசுடன் பேச்சுவார்த்தை நடாத்தவில்லை என்று இன்றுவரையில் பொதுவெளியில் அறிவிக்கவில்லை எனபதையும் நாம் கவனத்தில்கொள்ளவேண்டும்.

எனவே ஸ்ரீலங்கா அரசுடனான பஞ்சகுலசிங்கம் கந்தையா மற்றும் பல்வைத்தியர் சிவகணேசன், பாலசிங்கம் யோகராஜா ஆகியோரின் அபிவிருத்தி என்ற பதாதையின் கீழ் நடைபெற்ற பேச்சுவார்த்தைகள் மிக நுணுக்கமாகத் திட்டமிடப்பட்ட ஒரு நடவடிக்கையே.

இதில் தமிழ்நெற் ஜெயச்சந்திரன், ரீரீசி, நோர்வே ஈழமக்கள்அவை, சர்வதேச ஈழமக்கள்அவை, நோர்வே அரசின் பிரதிநிதிகள், நோர்வே அரசின் செயல்களை விமர்சனமின்றி ஏற்றுக்கொள்ளும் சில நோர்வே தமிழர்கள் என்று பலர் இணைந்து ஈடுபட்டுள்ளனர் என்பதும் தெளிவாகவே தெரிகிறது.

இதன்காரணமாகவே பஞ்சகுலசிங்கம் கந்தையா  மற்றும் பல்வைத்தியர் சிவகணேசன் ஆகியோரின் ஸ்ரீலங்கா அரசுடனான பேச்சுவார்த்தைகளை தமிழ்நெற் இணையத்தளமும் மற்றும் அவர்களைச் சார்ந்த பல ஊடகங்களும்  மூடிமறைத்தன. அதுபற்றி பேச மறுத்தன. புலிகளின் வானொலியாகிய தமிழ்முரசமும் இதுபற்றி மௌனம் சாதித்தது என்பது கவனிக்கத்தக்கது.

ஈழத்தேசியத்தின் அடிப்படை கோரிக்கைகளை முன்வைக்காது, ஸ்ரீலங்கா அரசுடன் இணைந்து பேச்சுவார்த்தையில் ஈடுபடுபவர்களை தீவிரமாக விமர்சிக்கும் தமிழ்நெற்கூட இதுசம்பந்தமாக எதையும் பேசவில்லை என்பது முக்கியமாகக் கவனத்தில்கொள்ளவேண்டியதொன்று. இதற்கு இரண்டு காரணங்கள் இருக்கமுடியும். முதலாவது தமிழ்நெற்க்கும் இந்தப் பேச்சுவார்த்தையில் பங்குண்டு. அல்லது தனது நண்பர்களை விமர்சிக்க முடியாத “நேர்மையற்ற இயலாமை”. இதுவும் ஒருவிதத்தில் ஸ்ரீலங்கா அரசுடனான ஒத்தோடித் தன்மையே.

நான், ஸ்ரீலங்கா அரசுடனான பேச்சுவார்த்தைகள் தவறானவை என்று கூறவரவில்லை. அவை அவசியமானவையே. அவர்களுடனான பேச்சுவார்த்தைகள் இன்றி எதையும் எம்மால் நகர்த்த முடியாது என்பதை 2009க்கு பின்னான காலம் அறிவித்திருக்கிறது.

ஆனால்
  • தமிழீழ தனியரசே ஒரே தீர்வு.
  • தலைவரின் வழியிலேயே நாம் செல்கிறோம்.
  • ஸ்ரீலங்காவை யுத்தக்குற்ற நீதிமன்றத்தில் நிறுத்தவேண்டும்.
  • ஸ்ரீலங்கா அரசுடன் எதுவித பேச்சுவார்த்தைகளையும் மேற்கொள்ளக்கூடாது
என்று மக்களிடமும், மாவீரர் நாட்களிலும் கூறிக்கொள்ளும் இவர்கள், தங்களின் சிந்தனையோட்டத்தில், கொள்கையில், தேசியம்பற்றிய பார்வையில், செயற்பாடுகளில்,  சிந்தனையில் மாற்றங்கள் ஏற்பட்டுள்ளன. ஸ்ரீலங்கா அரசுடன் மிக நெருங்கிய தொடர்புகள் எமக்குண்டு என்று மக்களுக்கு பகிரங்கமாக அறிவிக்கவேண்டும்.

அதுவே இத்தனை காலமாக இவர்களை விசுவாசித்து, இப்போதும் விசுவாசிப்பவர்களுக்கும் போராட்டத்திற்கும் அதன் பின்னான காலத்திலும் தமது ஆதரவை இவர்களுக்கு காட்டிய மக்களுக்கு இவர்கள் காண்பிக்கக்கூடிய ஆகக் குறைந்த உண்மைத்தன்மை.

ஆனால், ஆகக் குறைந்த உண்மைத்தன்மையையேனும் இவர்களிடம் இருந்து காணமுடியவில்லை. 



இரகசியப் பேச்சுவார்த்தையின் தொடர்ச்சி

எதிர்வரும் சில வாரங்களுக்குள் நோர்வே அரசாங்கமும் ஸ்ரீலங்கா அரசும் இணைந்து, நோர்வேயில் இரண்டு முக்கிய சந்திப்புக்களை நடாத்தவுள்ளன.
இதற்கு ஸ்ரீலங்கா அரசுக்கு நெருக்கமான மற்றும் ஸ்ரீலங்காவிலுள்ள நோர்வே தூதுவராலயத்துடன் மிக நெருக்கமாக இணைந்துசெயற்படும் உதவி நிறுவனம் ஒன்றின் இணைப்பாளரும் நோர்வே வருகிறார்.

இன்னொரு சந்திப்பிற்காக வடமாகாண சுகாதார அமைச்சரும் நோர்வே வருகிறார். வடமாகாண சுகாதார அமைச்சரின் வருகை தமிழர்களுக்குகூட அறிவிக்கப்படாது இரகசியமாகவே நடைபெறுகிறது.

இக்கூட்டங்களுக்கான அழைப்புக்கள் பேச்சுவார்த்தையில் ஈடுபட்டவர்களின் நண்பர்களுக்கு மட்டுமே அறிவிக்கப்பட்டுள்ளது.

அண்மையில் ஸ்ரீலங்கா அரசுடன் இரகசியப்பேச்சுவார்த்தையில் ஈடுபட்ட பஞ்சகுலசிங்கம் கந்தையா, நோர்வே தமிழர் சுகாதாரஅமைப்பின் தலைவர், பல்வைத்தியர் சிவகணேசன் மற்றும் பாலசிங்கம் யோகராஜா ஆகியோரின் பேச்சுவார்த்தைகளின் வெற்றியே நோர்வேயில் நடைபெற உள்ள இரண்டு நிகழ்வுகளும்.

அவை  தற்செயலானவை அல்ல என்பது அனைவராலும் புரிந்துகொள்ளக்கூடியதே. இது அவர்களின் இரகசியப்பேச்சுவார்த்தையின் தொடர்ச்சி. இது எதிர்காலத்திலும் தொடரும். நோர்வே அரசும் இதனை ஊக்குவிக்கவே விரும்பும் என்பதும் வெளிப்படை.

இது தவிர, விடுதலைப் புலிகளின் அமைப்பான நோர்வே தமிழ் சுகாதார அமைப்பிற்கு மீண்டும் உயிர்கொடுப்பதற்கும், அவர்களை ஸ்ரீலங்கா அரசுடன் அபிவிருத்தி என்னும் பதாதையின் கீழ் இணைப்பதற்கும் முயற்சிகள் நடைபெறுகின்றன. பல இளையோருடனும், அனுபவமான மருத்துவத்துறையினருடனும் மேற்கூறியவர்கள் தொடர்புகளை ஏற்படுத்திவருகின்றனர்.



பாலசிங்கம் யோகராஜாவும் நோர்வே கற்கைமையமும்

ஸ்ரீலங்கா அரசுடன் இணைந்து இரகசியப்பேச்சுவார்த்தையில் ஈடுபட்ட பாலசிங்கம் யோகராஜா அவர்கள் நோர்வே கற்கைமையம் என்னும் அமைப்பின் முக்கிய உறுப்பினர் மற்றும் அதன் ஸ்தாபகர்களில் ஒருவர்.

நோர்வே கற்றை மையமும் பாலசிங்கம் யோகராஜாவின் ஸ்ரீலங்கா அரசுடனான இரகசியப்பேச்சுவார்த்தைபற்றி இதுவரை பொதுவெளியில் எதையும் கூறவில்லை என்பதும்;, இப்படியான மௌனம்காக்கும் நிகழ்வுகள் இவர்களது நிறுவனத்திற்கும் ஸ்ரீலங்கா யுடனான பேச்சுவார்த்தைகளில் தொடர்பிருக்கிறதா என்ற கேள்விளை எழுப்புகிறது என்பதையும் இங்கு குறிப்பிடவேண்டும்.



அபிவிருத்தி அரசியலின் உள்நோக்கம்


அபிவிருத்தி என்னும் பதாதையின் கீழ் பேச்சுவார்த்தைகளை நடாத்தும் நோர்வே அரசும், இக்கட்டுரையில் குறிப்பிட்ட நோர்வே தமிழர்களும் ஸ்ரீலங்காவை அபிவிருத்திசெய்வதற்கு புலம்பெயர் தமிழர்களை உள்வாங்கவேண்டும் என்பதானது பின்வரும் கருத்தையே வெளிப்படுத்துகிறது.

யுத்தக்குற்றம், அடக்குமுறை போன்றவற்றைப் புரிந்த, தொடர்ந்து புரியும் ஸ்ரீலங்கா அரசுக்கு தமிழர்கள் உதவவேண்டும்.

யுத்தக்குற்றம் புரிந்தவர்களை, எம்மை அடக்கியாள்பவர்களை புலம்பெயர் தமிழர்களைக்கொண்டே அபிவிருத்திசெய்வதற்கு நோர்வேயும் சர்வதேச அரசுகளும் முனைகிறதா என்ற கேள்வி எழுவதும் இயற்கையல்லவா? இது புரியாதவர்கள் அல்லர் இந்த அபிவிருத்தி பேச்சுவார்த்தையாளர்கள்.

இப்படியான சர்வதேச அரசியலில் சிக்கிவிட்டிருக்கிறது ரீரீசி, நோர்வே மக்கள் அவை, மற்றும் நோர்வே அரசின் விசுவாசிகள்.
  • நோர்வேக்காக எங்கள் சமூகம் 30 ஆண்டுகளுக்கு மேலாக உழைத்திருக்கிறது. 
  • கணசமாக வாக்குவங்கியும் எம்மிடம் உண்டு. 
  • வெளிநாட்டவர்களுக்குள் சிறந்தவர்கள் என்ற பெயரும் இருக்கிறது. 
ஆனால் எமது குரல் நோர்வேயின் ஸ்ரீலங்காபற்றிய கருத்துக்களில் பிரதிபலிப்பதில்லை என்பதே உண்மை
  • நோர்வே அரசு, தமிழர்களுக்கான நியாயத்தினை ஏன் பேசாது இருக்கிறது? 
  • தமிழர்பகுதிகளில் ஏன் நோர்வே அரசின் உதவித்திட்டங்கள் பரவலாக இல்லை? 
  • நோர்வே அரசு, ஏன், ஸ்ரீலங்காவிற்க்கு சார்பாக நோர்வே வாழ் தமிழர்களிடமே ஸ்ரீலங்காக்கு உதவுமாறு கேட்கிறது? 
இதற்கான பதிலை அபிவிருத்தி பேச்சுவார்த்தையில் ஈடுபடுபவர்கள் தருவார்களா?

ஸ்ரீலங்கா அரசும், சர்வதேச அரசியலும் நோர்வேயில் உள்ள பல தமிழர்களையும் தமிழர் அமைப்புக்களை தமது கட்டுப்பாட்டிற்குள் கொண்டுவந்துள்ளது என்பதையே இந்நிகழ்வுகள் உணர்த்துகின்றன.

அபிவிருத்தி என்னும் பதாதையின் கீழ் ஸ்ரீலங்காவின் யுத்தக்குற்றங்கள், அடக்குமுறைகள் போன்றவற்றை மறைத்து ஸ்ரீலங்கா மக்கள் சுபீட்சமாக, ஒற்றுமையாக, கடந்தகாலங்களை மறந்து வாழ்கிறார்கள் என்று நிறுவுவதற்கான ஆரம்பப்படிகள் இவை.

ஸ்ரீலங்காவில் யுத்தக்குற்றம் நடைபெறவில்லை, அடக்குமுறைகள் எதுவுமில்லை என்று, தமிழர்களான எம்மைக்கொண்டே உலகத்திற்கு உரத்துக்கூறவைக்கும் எதிர்காலத்திற்கான ஆரம்பப்படி இது.

இவர்களைப்போன்றவர்களிடம் எமது சமூகம் மிக மிக அவதானமாக இருக்கவேண்டும்.



சமூகப்பொறுப்பின்மையின் விளைவுகள்

தூய்மையற்ற, சுயலாபம்கொண்ட அரசியல்வாதிகளின் வளர்ச்சிக்கும், ஏமாற்றுவித்தைகளின் தொடர்ச்சிக்கும் நாமே காரணம்.

எமக்குள்ள சமூகப்பொறுப்பினையும், பொதுநிறுவனங்களின் செயற்பாட்டில் பங்குகொள்ளும் கடப்பாட்டினையும் நாம் உரிய முறையில் பயன்படுத்திக்கொள்ள தவறும் இடங்களில் ஏமாற்றுக்காரர்களும், வியாபாரிகளும் தங்களின் இருப்பை உறுதிப்படுத்திக்கொள்கின்றனர். இவர்கள் சர்வதேச அரசுகளுக்கு தம்மை தமிழர்களின் பிரதிநிதிகளாகக் காட்டிக்கொள்கின்றனர்.

எனவே எமக்குரிய சமூகநிறுவனங்களை ஜனநாயக ரீதியில் கட்டியெழுப்புவதுமட்டுமல்ல, அவற்றின் வளர்ச்சியில் பங்குகொள்வதும் ஒவ்வொருக்கும் இருக்கவேண்டிய சமூகப்பொறுப்பாகும்.

இன்றைய காலத்தில், தேசியம்பேசிக்கொண்டும், விடுதலைப்புலிகளின் பெயரைக் கூறிக்கொண்டும் இப்படியான வியாபாரிகளும், சுயபிரபல விரும்பிகளுமே உள்ளனர் என்பதையும் காலம் மெது மெதுவாக எமக்கு உணர்த்திவருகிறது. இதனை விடுதலைப் புலிகளின் விசுவாசிகளும் மெது மெதுவாக உணர்ந்துகொண்டுவருகின்றனர். அவர்களால் ஜீரணிக்கமுடியாத யதார்த்தம் இது என்பது வேதனையாது.

விசுவாசம் தவறல்ல. ஆனால் விமர்சனமற்ற விசுவாசம் தவறானது என்பது எனது கருத்து






சனிப்பெயர்ச்சியின் அற்புதங்கள்

எனக்கு ஒருவனைத் தெரியும். அவனுக்கு வயது அதிகம் இருக்காது 25க்குள் இருக்கலாம். உடம்பில் மருந்துக்கும் சதை இல்லை. சிக்ஸ்பக் சிங்கம்.
பயங்கரமான ஒஸ்லோ முருக பக்தன். முதுகு பிய்ந்துபோகுமளவிற்கு முள்ளுக்குத்தி காவடி ஆடுவான். அவனுக்கு ஒரு காதலி இருக்கிறாள். அவளையும் நான் அறிவேன்.
இவன் ஒரு பாட்டுப் பைத்தியம்.
யூடியூப்பில் பாட்டுக்களை கேட்டபடியே அவற்றை தொலைபேசியினூடாக முகப்புத்தகத்தில் நேரலை செய்யும் பெரும் கலைஞன்.
இவனைப் பார்த்த பின்தான் தொலைக்காட்சிகள் தங்களது செய்திகளை முகப்புத்தகத்தில் ஒளிபரப்பத்தொடங்கியிருக்கலாம் என்ற அச்சமும் எனக்கு இருக்கிறது.
உடம்பெல்லாம் பச்சை குத்தியிருப்பான். ஒரு கை முழுவதிலும் காதலியின் பெயரை பச்சை குத்தியிருக்கிறான். ஒரு நாள் அவனிடம் «இந்தக் காதல் இல்லாது போனால் கையில் குத்தியிருக்கும் பச்சையை என்னடா செய்வாய் என்றேன்»
«அண்ணை … கேனயங்கள் மாதிரி கதைக்காதீர்கள்» என்பது போன்று என்னைப் பார்த்தான். அப்புறமாய் «அதே பெயரில் இன்னொருத்தியை பார்க்கவேண்டியதுதான்» என்றான். அப்படிப்பட்ட அற்புதமான அறிவாளி அவன்.
இன்று ஒரு கடைக்குச் சென்றேன். அவன் அங்கு நின்றிருந்தான். வணக்கம் பரிமாறிக்கொண்டோம்.
நான் கடைக்கு வெளியே வந்து நண்பருக்காக காத்திருந்தபோது. கையில் தொலைபேசியுடன் வந்தான். இவன் எதையும் முகப்புத்தகத்தில் ஒளிபரப்பு செய்யக்கூடியவன் என்பதால் சற்று ஒதுங்கி நின்றுகொண்டேன்.
அருகில் வந்தான்.
கையில் தொலைபேசி.
தொலைபேசியில் முகப்புத்தகம்.
முகப்புத்தகத்தில் நண்பர்கள் அரட்டை.
என்னைக் கண்டதும் தொலைபேசியை காற்சட்டைப்பையினுள் இட்டுக்கொண்டான்.
எனக்கு பெரும் ஆறுதலாக இருந்தது.
அப்போது தொலைபேசி சிணுங்கியது. அவன் தனது மணிக்கூட்டைப்பார்த்தான். அதில் அவனது அழகியின் படம் தெரிந்தது. கையை மடித்து வாயினருகில் கொண்டுசென்று காதலியுடன் பயபக்தியாக உரையாடினான். உரையாடல் முடிந்தது.
எனக்கு ஆச்சர்யம் தாங்கமுடியவில்லை. இப்போதுதானே கையில் தொலைபேசி வைத்திருந்தான். ஆனால் இப்போது மணிக்கூட்டினூடாக உரையாடுகிறானே என்று யோசித்தபோது அவனே திருவாய் மலர்ந்தான்.
«அண்ணை இதுதான் கடைசியாய் வந்த டெக்னோலஜி»
«அப்படியா?»
«இது கையில இருக்கும். ஆனால் தொலைபேசியோட இணைக்கப்பட்டிருக்கும்»
«புளுடூத் மூலமாகவா?» என்று எனக்கும் இதுபற்றி சிறு அறிவுண்டு என்று காண்பிக்க முனைந்தேன்.
«அண்ணை.. இதுக்குள்ளயே சிம் இருக்கிறது. இது புல் அட்வான்ஸ்ஆன தொலைபேசி, ஆனால் எல்லா செட்டிங்கும் தொலைபேசியில்தான்» என்று மினுங்கும் ஒரு தொலைபேசியை காற்சட்டைப்பையினுள் இருந்து எடுத்தான். அதில் இந்த மணிக்கூட்டு தொலைபேசியை எவ்வாறு இயக்குவது என்று காண்பித்தான்.
நானும் எனது அறிவுக்கு உட்பட்டு சில கேள்விகளைக் கேட்டேன்.
«உண்மையில் அண்ணண் இந்த மணிக்கூட்டுத் தொலைபேசி குழந்தைகளின் பாதுகாப்பிற்காகத்தான் உருவாக்கப்பட்டது»
«அப்படி இதில் என்ன விசேசம் இருக்கிறது?»
பையனின் முகத்தில் ஆயிரம் வால்ட் வெளிச்சம் தெரிந்தது. அவன் ஒரு விரிவுரையை ஆரம்பித்தான்.
«அண்ணை, கவனமாகக் கேளுங்கள்»
«ம்»
«இங்கே பாருங்கள். இப்போது, என்னை உங்கள் குழந்தையாக நினையுங்கள். நீங்கள் என் அப்பா»
«சரி»
«நான் காணாமல்போய்விட்டேன். நீங்கள் என்னைத் தேடுகிறீர்கள். உங்களுக்கு இதயநோய் வேறு இருக்கிறது»
«டேய், அண்ணன் பாவமடா»
« உஷ்….. கதையைக் கேளுங்கள்» என்றபடியே தொடர்ந்தான் «உங்களால் என்னை கண்டுபிடிக்கமுடியவில்லை. உங்களின் மகனான என்னிடம் இப்படி ஒரு மணிக்கூடு இருக்கிறது. நான் அதல் உள்ள ஆபத்து என்ற செயலியை அமத்துகிறேன்» என்று கூறி அந்த செயலியை அமத்தினான்.
முதலில் கடிகாரம் அலரியது. அப்புறமாய் தொலைபேசி அலரியது.
வெற்றிப் பெருமிதத்துடன் என்னைப் பார்த்தான்.
«இங்கே பாருங்கள்» என்று தொலைபேசியைக் காட்டினான். அதில் கடிகாரம் எங்கே இருந்து ஆபத்து என்ற சமிக்ஞை வருகிறது, எந்த வீதி, கட்டட இலக்கம் என்று பலதையும் அது காட்டிற்று.
இப்படித்தான் குழந்தைகளை பாதுகாப்பது என்று தனது விரிவுரைக்கு முற்றுப்புள்ளி கைவத்தான்.
அப்போது, அவனது காதலி தொலைபேசியில் வந்தாள். அவள் திட்டியிருக்கவேண்டும். பையன் «இப்போ அந்தக் கடைக்குப்போகிறேன்» என்றபடியே தொலைபேசியை துண்டித்தான்.
«அண்ணை, அவள் என்னை நன்றாக புரிந்தவள். நான் எப்போது, எங்கே, என்ன செய்கிறேன் என்னுமளவறிற்கு அவளுக்கு என்னைத் தெரிந்திருக்கிறது. நான் அதிஸ்டசாலையல்லவா?» என்றான்.
ஆமா.. ஆமா என்று ஜல்லிக்கட்டு காளைபோன்று தலையை ஆட்டியபோதுதான் எனது மரமண்டைக்குள் ஒரு மின்னல்போன்ற ஒரு ஒளி தோன்றி மறைந்தது.
« நீதானே வளர்ந்த ஆளாகிவிட்டாயே, இந்தளவு விலையான தொலைபேசியை வாங்கி ஏன் பணத்தை விரயமாக்குகிறாய்» என்றேன்.
திரும்பவும் «அண்ணை … கேனயங்கள் மாதிரி கதைக்காதீர்கள்» என்பது போலப் பார்த்தான். அப்புறமாய், «அண்ணை, நான் இதை வாங்கவில்லை. அவள்தான் கட்டாய அன்பளிப்பாகத் தந்தாள்»
«நீங்கள் உங்கள் காதலி கட்டாய அன்பளிப்பு தந்தால் மறுப்பீர்களா» என்று கேள்வியால் மடக்கினான்.
உனக்கு 50 வயது கடக்கும்போது இந்தக் கேள்விக்கு விடைதெரியவரும். என்றபோது…. தம்பியின் காதலி மீண்டும் தொலைபேசியூடாக வந்து… «இன்றும் அதே இடத்திலேயே நிற்கிறீர்கள்போல» என்றதும்…. தம்பி என்னை பெருமிதத்துடன் பார்த்து காதலியிடம் «யெஸ் டார்லிங்» என்றான்.
நானும் என் பங்குக்கு «தம்பி, உனக்கு ஒருவருக்கும் கிடைக்காத காதலி கிடைத்திருக்கிறாள், தொலைத்துவிடாதே» என்றேன்.
«என்ட செல்லத்தை சத்தியமாகத் தொலைக்கமாட்டேன்» என்று நெஞ்சில் அடித்துச் சத்தியம் செய்தான்.
«டேய்… நேற்று முன்தினம்தான் சனிப்பெயர்ச்சி நடந்ததாம். எனக்கேதோ சனி உன்னிடம் இந்த மணிக்கூடு உருவத்தில் வந்திருக்கிறது என்று பயமாக இருக்கிறது என்று சொல்வோமா என்று நினைத்துக்கொண்டிருக்கும்போது, காதலி மீண்டும் தொலைபேசியில் வந்தாள்.
அவள் எதையும் பேசுவதற்கு முன்பாகவே இவன்….
«வாங்கியாச்சுடா செல்லம்» என்றான்
«முதலில் கடைக்குப்போ…. என்னுடன் விளையாடாதே» என்று ஒரு கறாரான குரல் கேட்டது…
தம்பியை சனிபகவான் கவனிக்கத்தொடங்கிவிட்டார் என்பது நிட்சயமாயிற்று.
தம்பியிடம் இருந்து விடைபெறுவோம் என்று நினைத்தேன். ஆனால் தம்பி கடையை நோக்கி வேகமாய் ஓடிக்கோண்டிருந்தான்.

ஒஸ்லோ முருகனைக் கொலைசெய்வது எப்படி?

மனிதர்களுக்கு ஆன்மீகம் ஒருவித அமைதி, ஆறுதலைத் தருவதாலேயே கோடானுகோடி மக்கள் இறைவழிபாட்டை நாடுகிறார்கள். மதம்சார்ந்த நிறுவனங்களை உருவாக்கி அதனை இயக்குகிறார்கள். அவர்களின் சந்ததிகள் இவற்றை பின்தொடர்ந்துசெல்வதற்கான வழிமுறைகளை அவர்கள் உருவாக்கவும் செய்கிறார்கள். இப்படியான செயற்பாடுகளினால்தான் இன்று புலம்பெயர் தேசங்களில் பல இந்துக்கோயில்கள் உருவாகக் காரணமாயின. விதிவிலக்குகளும் உண்டு.
மேலே கூறியது ஒரு கற்பனையோ என்று எண்ணத்தை ஏற்படுத்தியது இன்றைய ஒஸ்லோ முருகன் கோயிலின் நிர்வாகத்தேர்வு. ஏற்கனவே பல நாட்களாக இழுப்பட்ட நிர்வாகத்தேர்வு இன்று நடைபெற்றது.
தனி மனிதர்களின் அகங்கார உக்கிரத் தாண்டவத்தை கண்ணுற்ற ஒஸ்லோ முருகனின் இதயம் நின்றுபோயிருக்கும் இன்று.
இந்துமதத்தின் அடிப்படைத்தத்துவமே நான் என்னும் அகங்காரத்தை அழிப்பதல்லவா? ஆனால் நான் என்னும் அகங்காரத்தினை வளர்த்தபடியே மதத்தினையும் மதநிறுவனங்களையும் நிர்வகிக்கும் மனிதர்களால் இந்துமதத்திற்கும், இந்துமத நிறுவனங்களுக்கும் எதுவித பிரயோசமும் இல்லை என்பதை எமது சமூகம் இன்னும் புரிந்துகொள்ளவில்லை.
எனக்கு அனைத்து மத தத்துவங்களிலும் ஆர்வமுண்டு. ஆனால் கிரிகைகளில், வழிபாட்டுமுறைகளில், சாமியார்களில், எனக்கு நம்பிக்கை இல்லை. இங்குள்ள ஆலயங்களின் நடைமுறைகளில் பெரும் விமர்சனம் எனக்கிருக்கிறது.
இந்து ஆலயங்கள் தம்மை இளையோருக்கு ஏற்றவகையில் மாற்றிக்கொள்ளாவிட்டால் இன்னும் ஒரு சந்ததியின் பின் வெறிச்சோடிவிடும் என்ற கருத்தும், ஆலயங்களின் நிர்வாகிகளுக்கு ஒரு மத நிறுவனத்தை எவ்வாறு உருவாக்குவது எவ்வாறு இயக்குவது, வழிநடாத்துவது, வளர்ச்சியடையவைப்பது என்ற செயற்பாடுகள் பற்றிய அறிவுத்திறன் சற்றேனும் இல்லை என்ற கருத்தும் எனக்கிருக்கிறது.
ஒரு பொருளை விற்பனை செய்யவேண்டுமாயின் பாவனையாளர்களிடம் அதனை சிறப்பான முறையில், நம்பகமானமுறையில் எடுத்துச்செல்லவேண்டும். அதுவே பாவனையாளர்களை தக்கவைக்கும். இளையோரை அற்ற செயற்பாடுகள் எமது சந்ததியுடனே அழிந்துவிடும் என்பதை நாம் இன்னும் உணர்ந்ததாய் இல்லை.
சிறந்ததொரு முருகபக்தன், அல்லது தினமும் கோயிலுக்குச் செல்பவர்கள், ஆண்டுதோறும் பறவைக்காவடி எடுப்பவர், தேவாரங்களை மனமுருகப் பாடுபவர்கள் அனைவரும் ஒரு மத நிறுவனத்தை நடாத்தும் திறமையுடையவர்கள் அல்லர். இவர்களில் மிக மிகச் சிலருக்கே இப்படியான திறமைகள் இருக்கும். இதுவே யதார்த்தம்.
இங்கு, இந்து ஆலயம் என்பது நோர்வே நாட்டுச் சட்டங்களின் கீழ் ஒரு மத நிறுவனமாகவே கணிக்கப்படும். மத நிறுவனங்களுக்கு என்று சட்டங்கள், ஒழுங்குகள், கட்டுப்பாடுகள், கண்காணிப்புக்கள், உதவிகள் என்று பலதும் உண்டு.
நோர்வேயில் ஒரு நிறுவனத்தை மிக முக்கியமாக பின்வரும் அலகுகள் கட்டுப்படுத்துகின்றன. அவற்றில் முதலாவது இந்நாட்டுச் சட்டம். இரண்டாவது நோர்வே நிறுவனப்பதிவகத்தில் பதிவுசெய்யப்பட்டுள்ள யாப்பு. இவையே சட்டரீதியாக ஒரு நிறுவனத்தைக் கட்டுப்படுத்தும். இதற்கப்பால் அந்நிறுவனத்தின் பொதுக்குழு தனது செய்பாட்டினைச் செய்யும். இதற்கும் அப்பால் அந்நிறுவனம் தனது செயற்பாடுகள் எவை எவை, அவை எவ்வாறு செயற்படவேண்டும் என்பது குறித்து தயாரித்துள்ள ஆவணம் அந்நிறுவனத்தின் நாளாந்த நடவடிக்கைகளை கட்டுப்படுத்தும். இவற்றை ஒரு நிறுவனத்தின் உள்ளக பரிசோதனை கட்டுப்பாடுக்குழுக்கள் ஆய்வுசெய்து நிறுவனங்களை வழிநடத்தும்.
இவற்றை மீறுவது தவறு என்பதை அனைவரும் அறிவோம். பல வழக்குகளில் நிறுவனத்தின் இயக்குனர்கள் தமது நாளாந்த செயற்பாடுகளை மீறியதற்காக சட்டரீதியாக தண்டிக்கப்பட்டுள்ளனர். அது தவிர பல மத நிறுவனங்களை இந்நாட்டு கணக்காய்வு, வரி;, தீ மற்றும் பாதுகாப்பு, சுகாதார திணைக்களங்கள் சட்டங்களை மீறியதற்காகத் தண்டித்துள்ளன.
இந்நாட்டின் நிறுவனக்கட்டமைப்பும், நிர்வாகக்கட்டமைப்பும் இருக்கும்போது இன்று ஒஸ்லோ முருக அடியார்கள் எவ்வாறு முருகனை ஆராதிக்கிறார்கள் என்பதையும் நான் கண்ட ஆன்மீக நிறுவனத்தின் சிறப்புக்களையும் பகிர்வதே எனது எண்ணம்.
இன்றைய கூட்டத்திற்கு முன்பு சில நிர்வாக சபைத்தேர்வுகள் நடைபெற்று பல சலசலப்புக்கள், சர்ச்சைகள், அச்சுறுத்தல்கள், வன்முறைச் செயற்பாடுகள் என்று ஒரு பெரும் நாடகமே சில மாதங்களாக நடந்தேறியிருந்தது. தேர்தல்குழுவினர் புதிய கூட்டம் ஒன்றினை கூட்டியிருந்தனர்.
ஒரு நிறுவனத்தினை இயக்குவது என்பது கிணற்றடி வாழைப்பழக்குலையை சந்தைக்கு எடுத்துச்சென்று விற்பது போன்ற ஒரு சிறுநடவடிக்கை அல்ல. வாழைப்பழக்குலையை வளர்த்து, பாதுகாத்து, சந்தைப்படுத்துவதற்கும் பல திறமைகள் அவசியமாக இருக்கும்போது ஒரு பெரும் மதநிறுவனத்தை, பல மில்லியன் குறோணர்கள் வருமானம் உள்ள நிறுவனத்தை, ஒரு இனத்தின் பாரம்பரிய மதரீதியான செயற்பாடுகளை தொலைநோக்குப்பார்வையுடன் நடாத்திச் செல்லவேண்டியவர்களுக்கு எத்தனை சிறப்புத் தகுதிகள் உள்ள துறைசார் நிபுணர்கள் தேவை என்பதை நினைத்துப்பாருங்கள்.
சட்டம், கணக்கியல், வரி, கட்டிடத்துறை, தீ மற்றும் பாதுகாப்பு, சுகாதாரம் என்று எத்தனை துறைகளில் பாண்டித்தியம் உள்ளவர்கள் தேவைப்படுவார்கள்? இவற்றினை முன்னின்று நடாத்தும் நிர்வாகக்குழுவிற்கு எப்படியான திறமைகள் இருக்கவேண்டும் என்பதை நாம் சிந்திக்கவேண்டாமா? பல நிறுவனங்களின் உரிமையாளர்கள் ஏன் தமது நிறுவனங்களை இயக்குவதற்கு வேறு திறமைசாலிகளைத் தெரிவுசெய்கிறார்கள் என்பதை நாம் எமது மதநிறுவனங்களை இயக்குபவர்களை தெரிவுசெய்யும்போது சிந்தித்துப்பார்க்கவேண்டும். தம்மை வளர்த்துக்கொள்ள விரும்பும் ஒரு நிறுவனம் எப்போதும் திறமைசாலிகளுக்கே முதலுரிமை கொடுக்கும். ஆனால் நாம்?
பொதுநிறுவனங்கள் மக்கள் மத்தியில் நம்பிக்கையை இழப்பதற்கு முக்கியகாரணமாக வெளிப்படைத்தன்மையின்மையைக் குறிப்பிடலாம். நோர்வே தகவலறியும் சட்டத்தின் பிரகாரம் அங்கத்தவர்களுக்கு தகவலறியும் உரிமை முழுமையாக உண்டு. இதை நடைமுறைப்படுத்தாத நிர்வாக உறுப்பினர்கள் சட்டத்தினால் தண்டிக்கப்பட்ட சம்பவங்களும் உண்டு.
ஒரு நிறுவனம் எனின் அங்குள்ள செயற்பாடுகள் எவ்வாறு நடைமுறைப்படுத்தப்படும் என்று வரையறுக்கப்பட்டிருக்கவேண்டும். யாருக்கு என்ன அதிகாரம், செயற்பாட்டு எல்லை எது என்பனவற்றை வரையறுக்கும் ஆவணங்கள் தயாரிக்கப்படவேண்டும். அவை மிக இறுக்கமாகப் பின்பற்றப்படவேண்டும்.
அத்துடன் ஏற்படுத்தப்பட்ட வரையறைகள் சிறப்பாக இயங்குகின்றனவா என்ற தரக்கட்டுப்பாடும் இருக்கவேண்டும். தரக்கட்டுப்பாடு அடையாளும் காணும் வரையறை மீறல்களைகளுக்குரிய தீர்வுகளை செயற்படுத்தும் செயற்பாடும் அங்கு காணப்படவேண்டும்.
நிறுவனத்தின் சட்டதிட்டங்கள், கட்டுப்பாடுகள், வரையறைகள் மீறப்படும்போது அதற்கெதிரான நடவடிக்கைகளை செயற்படுத்துவதற்கு நிறுவனத்தின் நிர்வாகமோ, பொதுக்குழுவோ தயக்கம் காண்பித்தலாகாது. அதாவது முறைகேடான கலாச்சாரம் உருவாவதை அனுமதித்தலாகாது. அப்போதுதான் ஒரு நிறுவனம் வளர்ச்சிப்பாதையில் நகர ஆரம்பிக்கும்.
முறைகேடான நிறுவனக் கலாச்சாரங்கள் ஆரம்பத்திலேயே அகற்றப்படாவிட்டால் அவையே கலாச்சாராமிவிடும். அதன்பின் அங்கு வளர்ச்சிக்கே இடமில்லை.
ஏன் இவற்றை எழுதுகிறேன் என்று நீங்கள் நினைக்கலாம். இன்று நடைபெற்ற பொதுக்குழுக் கூட்டத்தில் கடந்த வருடத்து தலைவர் உட்பட நிர்வாகஉறுப்பினர்கள், கணக்காய்வரளர், தேர்தல்குழு உறுப்பினர்கள், பொதுமக்கள் கூறிய சில கருத்துக்களை அவதானித்தால் நீங்கள் நான் மேலே எழுதியவற்றிற்கான காரணத்தைப் புரிந்துகொள்வீர்கள்.
உங்களை எச்சரிக்கிறேன். நீங்கள் மயங்கிவிழாதிருப்பதற்காக நீங்கள் உட்கார்ந்திருக்கும் நாற்காலியை இறுகப்பற்றிக்கொண்டபின் தொடர்ந்து வாசியுங்கள்.
1. இன்றைய பொதுக்கூட்டத்தில் கலந்துகொண்டு அங்கத்தவர்களுக்கு இருக்கவேண்டிய தார்மீகமான பொறுப்புணர்ச்சியை மருந்துக்கேனும் காணக்கிடைக்கவில்லை. இப்படியான பொறுப்பற்ற அங்கத்தவர்களைக் கொண்ட ஒரு நிறுவனம் எவ்வாறு வளர்ச்சிப்பாதையில் செல்லும் என்ற கேள்வி எனக்கிருக்கிறது.
2. யாப்பு என்பதனை மீறிய தேர்தல் நடைபெற்றது. தேர்தலை ஏற்பதா இல்லையா என்ற வாக்கெடுப்பு உண்மையில் யாப்பினை மீறுவதா இல்லையா என்பதற்கான வாக்கெடுப்பே அன்றி வேறு எதுவுமில்லை. இவ்விடத்தில் இந்நாட்டுச் சட்டங்கள் மீறப்படுகின்றன என்பதை குறிப்பிடவேண்டும். சட்டத்;தினை மீறுவதற்கு பொதுக்குழு அனுமதியளிக்கிறது என்பது அபத்தத்தின் உச்சம். சட்டரீதியாக இப்படியான செயல்கள் தவறானவை என்ற புரிதல் இன்மை என்பதும் வேதனையான விடயமே.
3. குழுக்களும் அவர்களின் ஆதரவாளர்களும் மிகவும் கீழ்த்தரமாகவே நடந்துகொண்டார்கள். அங்கு நடந்த வார்த்தைப்பிரயோகங்களை இங்கு எழுதமுடியாது. ஏறத்தாழ கைகலப்பு நிலை. பலரையும் கட்டுப்படுத்திய மனிதர்கள் இல்லையேல் இன்று வன்முறையில் கூட்டம் முடிந்திருக்கும்.
4. உயிராபத்து ஏற்படுத்துவேன் என்ற அச்சுறுத்தல்கள். (இது இந்நாட்டில் பாரிய குற்றம்)
5. பணவிரயம் செய்யப்படுவதாகச் சுட்டிக்காட்டியதற்காக கணக்காய்வாளருக்கு உயிர் அச்சுறுத்தல் ஏற்படுத்தியமை. அவருக்குரிய கணக்காய்வுகளை செயற்படுத்துவதற்கு கடந்த வருட நிர்வாக உறுப்பினர் ஒருவர் பல முட்டுக்கட்டைகளை தோற்றுவித்ததாக கடந்த ஆண்டுத் தலைவரே கூறினார். (இதன்போதும் பொதுக்குழு எதுவித நடவடிக்கையையும் எடுப்பதற்காக முன்னெடுப்பில் ஈடுபடவில்லை.
6. தனது வாகனத்தின் பற்றரியினை சார்ஜ் செய்வதற்கு மின்சாரம் தரப்படவில்லை என்று ஒரு பக்தர் நிர்வாகத்தினருடன் முரண்பட்டார். மின்சாரத்தை ஏன் நிறுத்தினீர்கள், யார் அதை நிறுத்தக் கட்டளையிட்டார்கள் என்பது அவரது பிரச்சனை.
7. யாப்பினை மீறி அய்யர் நகை சேகரிப்பில் ஈடுபட்டாராம். இதற்கு ஆதரவாக ஒரு குழு. ஏதிராக இன்னொரு குழு.
8. கணக்குகளை பார்வையிட அனுமதிகோரிய பொதுக்குழு உறுப்பினருக்கு கணக்குகள் காட்டப்படவேண்டிய அவசியம் இல்லை என்று கணக்காய்வாளருக்கு அறிவிக்கப்பட்டதாக கணக்காய்வாளர் அறிவித்தார்.
9. தேர்தல் திருவிளையாடல்களால் முருகனுக்கு தேவையான பொருட்கள் கிடைக்கவில்லையாம். பழங்கள் அழுகிப் பழுதடைந்தனவாம், வருமானம் வங்கியில் இடப்படவில்லையாம். நிர்வாகம் சில நாட்களாக சீராக இயங்கவில்லை.
இப்படியான குற்றச்சாட்டுகள் அளவுகணக்கில்லாதவை, பாரதூரமானவை சில சிறுபிள்ளைத்தனமானவை. எனவே இத்துடன் அவற்றை நிறுத்திக்கொண்டு இவற்றிற்கு பொதுக்குழு என்ன நடவடிக்கை எடுத்தது என்று பார்ப்போம்.
பொதுக்குழு என்பது ஒரு நிறுவனத்தின் அத்திவாரம். யாப்பின் அடிப்படையில் பொதுக்குழுவே நிறுவனத்தை வழிநடாத்தும். பொதுக்குழுவே ஒரு நிறுவனத்தின் அதிஉச்ச அதிகாரசபை.
இன்று முன்வைக்கப்பட்ட எதுவித குற்றச்சாட்டுக்களுக்கும் பொதுக்குழு எதுவித நடவடிக்கையையும் எடுக்கவில்லை என்பது மிகவும் கண்டனத்திற்குரியது. இப்படியான மனநிலையானது பொதுக்குழு அங்கத்தவர்களுக்கு ஆலயத்தின் நிர்வாகத்தில் எதுவித ஆர்வமும் இல்லை என்பதையே காட்டுகிறது.
ஏறத்தாழ 220 அங்கத்தவர்கள் சமூகமளித்திருந்தனர். பலர் கட்டாயப்படுத்தப்பட்டு அழைக்கப்பட்டிருந்தனர். அவர்களும் வந்தார்கள். தமக்கு கூறப்பட்டவர்களுக்கு வாக்களித்தார்கள். சென்றார்கள். இதுவும் ஒருவிதத்தில் கூலிக்கு மாரடித்தலே. ஒருவர் தனக்கு 10க்கும் அதிகமான குறுஞ்செய்திகள் வந்ததாகக் காண்பித்தார்.
சமூகம்பற்றிய, ஆலயத்தின் வளர்ச்சிபற்றிய சிந்தனையுடையவர்கள் ஒரு சிலரே. அவர்களாலும் மௌனித்து இருக்கவே முடிந்தது. ஆடையற்றவன் ஊரில் ஆடையணிபவன் போன்ற நிலை அவர்களுடையது.
இன்றைய கூட்டம் பலவிதமான முறுகல் நிலைகளை உருவாக்கியிருக்கிறது. குழுக்களிடையேயான பிளவுகள் மேலும் விரிவடைந்துள்ளன. பொதுக்குழு யாப்பினை மீறி தேர்தலை நடாத்துகிறது. தவறான, முறைகேடான, ஆலயஒழுங்குகளை மீறியவர்கள், யாப்பு விதிகளை மீறியவர்கள் மீது எதுவித நடவடிக்கையையும் பொதுக்குழு மேற்கொள்ளவில்லை. யாப்பினை திருத்தி, ஆலயத்தின் செயற்பாடுகளை ஒழுங்கமைக்கும் எண்ணமும் எவரிடமும் இல்லை. ஆக பிரச்சனைகளுக்கான தீர்வுகள் எட்டப்படவில்லை.
ஐந்தறிவு மிருகங்கள்கூட ஒருமுறை செய்து தவறினை மீண்டும் செய்வதில்லை. ஆனால் நாம் மீண்டும் மீண்டும் அவை சிறப்பாக நடந்தேற வழிவகுக்கிறோம்.
என்னவிதமான சமூகத்தில் வாழ்கிறோம் நாம்? இப்படியா எமது குழந்தைகளுக்கு வழிகாட்டப்போகிறோம்? என்ற சிந்தனையும் எவரிடத்திலும் இல்லை.
ஆலயம் என்பது அமைதியன் இருப்பிடமல்லவா? ஆலய செயற்பாடுகளில் அதிகார எண்ணத்துடனும்; அகங்கார எண்ணத்துடனும் செயற்படுபவர்கள் எவ்வாறு இப்படியான நிறுவனங்களை சிறப்பாகவும் வளர்ச்சிப்பாதையிலும் இட்டுச்செல்வார்கள்?
சற்றேனும் சிந்தியுங்கள். குற்றுயிராய் இருக்கும் ஒஸ்லோ முருகனை முதலுதவி செய்து காப்பாற்றிய புண்ணியமாவது உங்களுக்குச் சேரும்.
ஏறத்தாள 6 மணிநேரத்தின் பின் தேர்தல் முடிந்துவிட்டது எல்லாம் சுபம் என்ற பேச்சுக்களுடனும், சேர்ந்தியங்கவேண்டும் என்ற அறிவுரைகளுடனும், மேலும் பல பல உத்தரவாதங்களுடனும் ஒஸ்லோ முருகனைக் கொலைசெய்யும் ஒரு சமூகம் கலைந்துபோனது.
நான் கோயிலுக்குள் சென்றேன். கர்ப்பக்கிரகத்தில் இருந்த முருகன் என்னை அருகே அழைத்தான்.
அருகே சென்று ‘என்னய்யா’? என்றேன்.
“உனக்கு ஒரு இரகசியம் சொல்லவேண்டும்“
“சரி... சொல்“
‘இந்த திருக்கூத்து முருகன்கோயிலில் மட்டும்தான் என்று மட்டும் நினைக்காதே’ என்பதுதான் அது.
அப்போது அம்மனும், பிள்ளையாரும் முருகனின் பின்னால் அழுதுகொண்டு நின்றார்கள்.
‘ஆ’ என்று வாயைப்பிளந்தேன்